| Hinn 6. október 2009 var tilkynnt að nýr hringur hefði fundist
umhverfis Satúrnus. Hringur þessi er svo daufur að hann sést ekki frá
jörðu, en mynd náðist af honum með Spitzer sjónaukanum sem er á braut um
sólina (ekki jörðina) og er næmur fyrir innrauðu ljósi. Hinn nýi hringur
er alls ótengdur þeim sem áður voru þekktir. Hann fylgir braut tunglsins
Föbe og er því langt utan við hið hefðbundna hringakerfi og myndar 27°
horn við það. Talið er að hann sé úr mjög smágerðum ögnum sem dreifst
hafi frá Föbe eftir árekstra þess tungls við reikisteina. Um aðra hringa
Satúrnusar má lesa hér. Þ.S. 7. október 2009. |