Ný tungl Júpíters

Snemma árs 2004 tilkynntu stjörnufræðingar við Hawaii-háskóla að tveir smáhnettir sem fundust árið 2003 hefðu reynst vera á braut um reikistjörnuna Júpíter. Höfðu þá samtals 23 ný tungl bæst í fjölskyldu Júpíters á því ári. Áður voru þekkt 40 tungl þessarar reikistjörnu svo að heildarfjöldinn er nú kominn í 63. Lítill vafi er á, að enn fleiri tungl eigi eftir að koma í leitirnar.

Þessi nýjustu tungl fundust við leit með þremur stórum sjónaukum á fjallinu Mauna Kea á Hawaii. Tunglin eru afar lítil, á að giska 2 km í þvermál, og ganga um Júpíter eftir aflöngum, hallandi brautum. Eins og flest þeirra smátungla sem fundist hafa við Júpíter á síðustu árum ganga þau í öfuga stefnu við stóru tunglin. Bendir það til þess að þau séu reikistirni sem Júpíter hafi fangað með aðdráttarafli sínu. Sjá enn fremur yfirlitið Tungl reikistjarnanna.

Þ.S. 26.2. 2004