Eins og greint er frá í almanaki 2012 (bls. 66) er Venus kvöldstjarna í aprílmánuði þetta ár, skær og áberandi á vesturhimni. Hún reikar til austurs miðað við fastastjörnurnar. Að kvöldi 3. apríl verður hún stödd í Sjöstirninu og ætti það að vera falleg sjón ef veður leyfir. Því miður vantar þá aðeins þrjá daga í tunglfyllingu svo að himinninn verður ekki fyllilega dimmur. Júpíter er líka kvöldstjarna á vesturhimni, en lægra á lofti en Venus og ekki nærri því eins bjartur.
--------------------------
Viðbót.
   Skýjað var á Reykjavíkursvæðinu þetta kvöld, en annars staðar á landinu sást til stjarna. Snævarr Guðmundsson var staddur á Breiðamerkursandi og tók myndina hér fyrir neðan.

Auk Venusar sést Júpíter lágt yfir fjöllum. Hér kemur stækkun úr sömu mynd:

Loks setti Snævarr myndina af Venusi (sem er í rauninni oflýstur blettur) inn á eldri mynd af Sjöstirninu, sem hann hafði tekið við annað tækifæri með sjónauka.

Þ.S. 1.4  2012. Viðbót 10. 4. 2012.

Almanak Háskólans