Eins og flestir vita þekja höf og vötn meirihluta yfirborðs jarðar. En hversu mikið er vatnsmagnið?

Áætlað er að yfir 96% af öllu vatni á yfirborði jarðar sé í höfunum. Við það bætist það vatn sem bundið er í ís og jöklum, grunnvatn, vatnsgufa í andrúmsloftinu og ferskvatn í  vötnum og ám. Sú viðbót nemur samanlagt tæplega 4% af vatnsbirgðum jarðar. Heildarmagnið nemur 1,4 milljörðum rúmkílómetra.¹⁾ Það svarar til 2,7 km dýpis ef vatninu væri dreift jafnt yfir allt yfirborð jarðarinnar. Úr öllu þessu vatni mætti gera hnött sem væri 1400 km í þvermál og hefði þá nálægt 40% af þvermáli tunglsins og um 6 % af rúmmáli þess.

Um tíma var talið hugsanlegt að verulegur hluti af vatni jarðar hefði borist til hennar með halastjörnum. Í samanburði við jörðina eru halastjörnur afar efnislitlar. Lauslega reiknað þyrfti 40 milljón halastjörnur til að mynda höfin á jörðinni ef meðalmassi halastjörnu er 10¹⁴ kg (100 gígatonn) og þriðjungurinn af efninu er vatnsís eins og líklegt er talið, en hvorugt er vitað með vissu. Þessi kenning um uppruna vatnsins á jörðinni er nú fallin í skuggann. Nýjustu rannsóknir benda til þess að vatnið sé upprunalegt frá myndun jarðar. 

¹⁾ Encyclopedia of Climate and Weather, Oxford University Press, 1996

 Þ.S. 4. september 2007. Breytt 24.11. 2015