|
Fylgst með þvergöngu Venusar
Ljósmynd: Pálmi Ingólfsson Veður
var hagstætt hér á landi hinn 8. júní þegar Venus gekk fyrir sól og
margir gátu fylgst með þessum sjaldgæfa atburði. Fjöldi manna víðs
vegar um heim tók þátt í skipulagðri tilraun til að mæla fjarlægð
sólar með þeirri gömlu en merkilegu aðferð að taka tímann þegar Venus
færi inn fyrir sólröndina og út fyrir hana aftur, séð frá
mismunandi stöðum (sjá fyrri frétt um
þvergönguna). Samkvæmt upplýsingum á vefsíðu
Stjörnustöðvar Evrópulanda (ESO) bárust 4400 tímamælingar frá 1500
athugunarmönnum. Allar þessar mælingar voru síðan notaðar til að reikna
fjarlægðina milli jarðar og sólar. Þótt ótrúlegt megi virðast var
útkoman svo nærri lagi að ekki skakkaði meira en 30 þúsund kílómetrum,
eða 0,02%. Óhætt er að segja að enginn hafi búist við svo réttri
niðurstöðu, og hallast sumir að því að þetta hljóti að vera
tilviljun! Myndina hér að neðan tók Snævarr Guðmundsson með Meade ETX-90 (mm) sjónauka.
Þ.S. 10. júlí 2004. Viðbót 1.1. 2005.
|
