Halastjarna á himni

Þessa dagana er halastjarna sýnileg á kvöldhimninum frá Íslandi, hátt á vesturhimni eftir að dimmt er orðið. Hún er ekki sérlega björt, á mörkum þess að sjást með berum augum, en sést greinilega í handsjónauka sem óskýr ljóshnoðri. Halastjarna þessi gengur undir nafninu 2006 M4 SWAN, gjarnan stytt í SWAN. Nafnið vísar til tækis sem er um borð í gervitunglinu SOHO og kannar áhrif sólvindsins á vetni í nærgeimnum (SWAN er stytting á "Solar wind anisotrophies"). Halastjarnan fannst á myndum sem teknar voru með tækinu í júní s.l. Þegar þetta er ritað (19. október) er hún í stjörnumerkinu Hjarðmanni (Boötes), en hreyfist um það bil 2 gráður á dag, gengur inn í stjörnumerkið Norðurkórónuna hinn 23. október og þaðan yfir í Herkúlesarmerki. Hinn 17. október var hún rétt ofan við stjörnuna Gamma í Hjarðmanni, sbr. kortið á þessari vefsíðu:

 http://www.aerith.net/comet/catalog/2006M4/2006M4.html. 

Kortið er ekki alveg nákvæmt því að ferillinn er teiknaður sem röð af beinum línum milli reiknaðra punkta í stað sveiglínu. 

Viðbót 24. nóv. Halastjarnan er nú í námunda við stjörnuna Altair, björtustu stjörnuna í stjörnumerkinu Erninum. Birtustig hennar er um +8,0 svo að sjónauka þarf til að sjá hana.

Þ.S. 19.10. 2006. Viðbót 24.11.06