Lengd rökkurtímans

    Línuritið hér að ofan sýnir rökkurlengd í Reykjavík á mismunandi árstímum. Með rökkri er átt við þann tíma sem líður frá sólsetri til myrkurs, eða þann tíma jafnlangan sem líður frá birtingu til sólarupprásar. Rökkurtíminn er skemmstur nálægt jafndægrum en lengstur í maí og júlí. Um jafndægrin rís sól og hnígur brattar en á öðrum árstímum og skýrir það hvers vegna rökkurtíminn er þá tiltölulega stuttur. Þegar líður á maímánuð verður ekki myrkt af nóttu svo að rökkurtímar kvölds og morguns mætast á miðnætti. Þá reiknast rökkrið aðeins frá sólsetri til miðnættis (eða frá miðnætti til sólarupprásar), og sá tími styttist fram að sumarsólstöðum. Eftir því sem norðar dregur á landinu verður lágmarkið við sumarsólstöður meira áberandi, og allra nyrst er ekkert rökkur á þessum árstíma.
    Stysti rökkurtími í Reykjavík er þrír stundarfjórðungar, í mars og september, en lengsti rökkurtíminn er tvær og hálf klukkustund, í maí og júlí. Mynda þá kvöldrökkrið og morgunrökkrið fimm stunda samfellu. Í öðrum landshlutum verða svipaðir hámarks- og lágmarkstímar rökkurs í sömu mánuðum, en lágmarkið á sumarsólstöðum breytist mjög með hnattstöðu eins og fyrr er sagt.

(Úr Almanaki Háskólans 2004)