Orðaskrá Stjarnvísindafélagsins

Árið 1996 gaf orðanefnd Stjarnvísindafélags Íslands út ensk-íslenska og íslensk-enska orðaskrá úr stjörnufræði sem náði yfir rúmlega tvö þúsund hugtök. Þessi skrá var síðar tölvutekin og aðgangur veittur að henni í orðabanka Íslenskrar málstöðvar. Á árinu 2001 var unnið að endurskoðun stjörnuorðaskrárinnar og stækkun hennar. Þeim áfanga er nú lokið og má líta svo á að það jafngildi annarri útgáfu skrárinnar þótt hún sé enn ekki komin í bókarform. Skráin geymir nú 2261 hugtak. Hún er annað og meira en þýðingarlisti því að þar er að finna skýringar í stuttu máli á fjölmörgum atriðum. Næsta skref verður væntanlega það að skjóta inn myndefni til frekari fróðleiks.

Þeir sem hafa hug á að nýta sér orðaskrána geta nálgast hana með því að smella á tilvísunina hér að neðan. Í sambandi við notkun tölvuorðabankans er vert að benda á eftirfarandi atriði . Í fyrsta lagi þarf að velja rétt tungumál áður en leitin hefst. Í öðru lagi getur verið betra að einskorða leitina við "Stjörnufræði" nema ætlunin sé að leita í fleiri orðaskrám, t.d. orðaskrá um eðlisfræði. Í þriðja lagi getur verið þægilegt að slá aðeins inn hluta úr orði eða orðasambandi ef óvissa ríkir um einhvern lið þess, eða óskað er eftir að sjá skyld orð. Þannig má slá inn *longitude til að fá öll orðasambönd sem enda á orðinu longitude (7 talsins), longitude* til að fá sambönd  sem byrja á þessu sama orði (4 tilvik) eða *longitude* til að fá sambönd sem innihalda þetta orð (9 tilvik).  Ef skýringu vantar á skammstöfun (t.d. AAT eða VLBI) nægir að slá hana inn. Nánari upplýsingar er að finna í hjálpartexta orðabanka Íslenskrar málstöðvar.

Hér fæst svo samband við orðabankann.
 

Þ.S. des. 2001, viðbót 3.2. 2006. Breytt 6.10. 2011


Almanak Háskólans