Síðan 2019 hefur klukkunni í Marokkó verið seinkað um eina klukkustund yfir helgitímann Ramadan. Í ár (2023) stendur Ramadan frá kvöldi 22. mars til kvölds 21. apríl. Þennan mánuð gildir miðtími Greenwich í Marokkó eins og á Íslandi. Sama regla hefur verið tekin upp í nágrannaríkinu Vestur-Sahara.

Frá og með 1. nóvember 2021 varð austasta hérað Kanada, Yukon, á föstum tíma árið um kring, 7 klst. á eftir íslenskum tíma, og fylgir ekki lengur sumartímabreytingum annars staðar í Kanada.
 
Á bls. 61 í almanaki  2023 er lýst tunglmyrkvanum  28. október.  Þar segir að þegar myrkvanum ljúki, kl. 22:28, sé tungl komið hátt á loft í suðaustri frá Reykjavík. Þarna hefði mátt geta þess að tunglið verður mjög nálægt reikistjörnunni Júpíter sem þá er björtust sýnilegra stjarna á himni.

Á bls. 81 í almanaki 2023 segir að 1 mól sé magn efnis í kerfi sem inniheldur jafnmargar efniseindir og frumeindirnar eru margar í 12 g af kolefni 12, og að fjöldi einda sé nálægt 6,02 ∙ 10²³. Árið 2019 var skilgreiningunni breytt þannig að eitt mól sé nákvæmlega 6,02214076 ∙ 10²³ efniseindir. Er þá yfirleitt verið að fjalla um mjög smáar eindir eins og frumeindir eða sameindir. Talan í skilgreiningunni heitir Avogadrostala.

Á bls. 85 í almanaki 2023 er skilgreining á amperi sem er úrelt. Árið 2019 var amperið endurskilgreint sem sá rafstraumur sem jafngildi því að 1,602176634 ∙ 10¹⁸ rafeindir eða róteindir fari fram hjá hverjum stað á sekúndu hverri.

Á bls. 88 í almanaki 2023 segir að höfuðborgin Nuuk Grænlandi fylgi tíma sem er 3 stundum á eftir íslenskum tíma, en klukkunni sé flýtt á sumrin (auðkennt með *). Það var gert 25. mars 2023, en klukkunni verður ekki seinkað aftur í október eins og til stóð. Ákveðið hefur verið að sumartími verði framvegis í gildi allt árið í öllum tímabeltum á Grænlandi. Nuuk verður því 2 stundum á eftir íslenskum tíma.

Á bls. 62 í almanaki  2024 er lýst tunglmyrkva 18. september og hann sagður vera hálfskuggamyrkvi. Hið rétta er að myrkvinn verður deildarmyrkvi þótt alskugginn nái aðeins að þekja 9% af þvermáli tungls. Tunglið gengur í alskuggann frá kl. 03:12 til kl. 03:17.  Aðrar tölur í lýsingunni eru réttar.