Hver skyldi þá vera hafnartími Reykjavíkur? Í Almanaki Háskólans eru upplýsingar um hvort tveggja, gang tunglsins og sjávarföll. Þar má sjá hve langur tími líður frá því að tungl er í suðri þar til næsta háflóð verður. Athugun á árunum 2014 og 2015 sýndi að bæði árin var meðalbiðin 4 stundir og 47 mínútur, en frávik gátu numið u.þ.b. klukkustund á hvorn veg. Nánar tiltekið voru niðurstöðurnar þessar:

2014: Meðaltal 4^h 47^m. Minnst 3^h 53^m, mest 5^h 55^m

2015: Meðaltal 4^h 47^m. Minnst 3^h 54^m, mest 5^h 51^m

Þarna er að vísu um flóðspá að ræða en ekki mældan flóðtíma. Það ætti ekki að hafa áhrif á meðaltalið, en frávikin verða vafalaust meiri en þetta í reynd. Miðað við þær niðurstöður sem lýst er í  greininni Flóðtöflur almanaksins má búast við frávikum sem nema fimm stundarfjórðungum frá meðalgildinu 4^h 47^m sem kalla má hafnartíma Reykjavíkur.

Þ.S. 19. 2. 2015