Algengast er að páskadagur sé í einmánuði. Ef páskar eru mjög snemma, getur páskadagur fallið á góu. Það heita góupáskar. Slíkt er mjög sjaldgæft og vekur gjarna nokkra athygli. Á síðustu öld gerðist þetta aðeins tvisvar, árin 1913 og 1940. Á þessari öld hendir það aðeins einu sinni, árið 2008. Næstu góupáskar verða svo ekki fyrr en árið 2160. Meðaltími milli góupáska er 35 ár, en bilið er æði misjafnt, getur farið niður í 11 ár og upp í 152 ár.

   Sumarpáskar eru öllu algengari. Þeir verða að meðaltali á 15 ára fresti. Stysta bilið er 3 ár en það lengsta 41 ár. Á síðustu öld urðu sumarpáskar sjö sinnum. Var það árin 1905, 1916, 1943, 1962, 1973, 1984 og 2000. Á þessari öld gerist þetta sex sinnum: árin 2011, 2038, 2057, 2068, 2079 og 2095. Þegar sumarpáskar verða, falla tveir hátíðisdagar á sömu dagsetningu, skírdagur og sumardagurinn fyrsti.

 Þ.S. 18. febrúar 2008. Viðbót 10. mars 2008.