|
Fyrir þremur árum var greint frá því á þessum vef að tekist hefði að
greina merki hérlendis um reikistjörnur í fjarlægum sólkerfum (sjá
hér). Það var Snævarr Guðmundsson stjörnuáhugamaður sem leysti þessa
þraut. Nú hefur Snævarr rýnt í eldri mælingar sem hann átti í fórum
sínum og sent umsjónarmanni vefjarins eftirfarandi bréf: Sæll
Þorsteinn, Veturinn 2010-2011 reyndi ég að mæla fjarreikistjörnurnar
HAT-P-10b/Wasp 11b (14.11.2010) og XO-5b (27.11.2010). Þetta var um
tveim árum fyrr en þær mælingar sem sagt er frá á almanaksvefnum. Á þeim
tíma hafði ég takmarkaða þekkingu á hvernig haga skyldi vandasamri
gagnaöflun og úrvinnslu, en lét það samt ekki aftra mér frá að reyna. Í
úrvinnslunni notaði ég fremur óheppilegt ljósmælingaforrit fyrir svona
mælingar. Það varð til þess að eftir langa mæðu og margra kvölda erfiði,
sáust ekki nokkrar vísbendingar um þvergöngur fjarreikistjarnanna. Þetta
voru mikil vonbrigði auðvitað og drógu úr trú minni á að geta nokkru
sinni numið slíka atburði. Að sjálfsögðu sagði ég engum frá þessu, bar
vonbrigðin í hljóði. Tveim árum seinna, eftir að hafa lært hvernig haga
skyldi aðferðum og séð árangurinn sem segir frá á almanaksvefnum, gaf ég
þessi gögn upp á bátinn enda var svo margt sem hafði verið gert
rangt í gagnaöflun og því var ég sannfærður um að þessar myndir væru
einskis virði.
Myndirnar voru samt alltaf geymdar. Ég hef ekki velt þeim mikið fyrir
mér fyrr en nú fyrir stuttu. Þá ákvað ég að reyna að komast að því hvort
engar vísbendingar birtust um þvergöngurnar, þar sem ég hef nú mun betra
forrit og meiri reynslu í ljósmælingum en fyrir sex árum síðan. Og viti
menn, mér hafði tekist að nema þvergöngurnar. Þær voru ekki eins skýrar
og síðar varð en ég ákvað samt að senda þær og láta meta. Ég sá í kvöld
að ETD hafa samþykkt þessar mælingar. Þær eru á:
http://var2.astro.cz/tresca/transit-detail.php?id=1457906997
(Stjarnan HAT-P-10b/Wasp 11b, 14.11.2010) og
http://var2.astro.cz/tresca/transit-detail.php?id=1458079276
(Stjarnan XO-5b, 27.11.2010).
Þetta er staðfesting á að hafa numið þvergöngur fjarreikistjarna tveim
árum fyrr en fram kemur á vefnum. Í vetur tókst mér einnig að mæla
þvergöngu HAT-P-9b: (http://var2.astro.cz/tresca/transit-detail.php?id=1456354270)
og vorið 2014 mældi ég Kelt-3b:
(http://var2.astro.cz/tresca/transit-detail.php?id=1393543217).
Það eru því nokkrar fleiri þvergöngur sem tekist hefur að nema á síðustu
6 árum, þó afköstin séu lítil í samanburði við það sem gerist erlendis.
Bestu kveðjur,
Snævarr
Þ.S. 29.3. 2016 |